CHUO CHA UFUNDI ARUSHA CHALETA UKOMBOZI

 

UCHUNGUZI uliofanywa katika hospitali mbalimbali nchini umebaini kuwa mashine na vifaa vingi vya kitaalamu vinapoharibika huwekwa stoo kwa sababu hakuna wataalamu wa kuvitengeneza, hali ambayo huchangia uzoroteshaji wa utoaji huduma zinazohitaji vipimo. Hali hiyo ilibainika katika hospitali mbalimbali nchini, zilizofanyiwa utafiti huo, kwa lengo la kujua ukubwa wa tatizo hilo la vifaa vinapopelekwa baada ya kuharibika, ambavyo hununuliwa kwa fedha nyingi kutoka nje ya nchi. Baadhi ya hospitali zilizofanyiwa utafiti huo ni zile za rufaa za Mount Meru mkoani Arusha, KCMC mkoani Kilimanjaro, nyingine ni Hydomu, St. Elizabeth na Seliani. Ofisa habari kutoka Chuo cha Ufundi Arusha (ATC), Gasto Leseiyo, aliiambia Tanzania Daima kuwa hospitali zote hizo zina vifaa vya kupimia maradhi mbalimbali lakini vimewekwa stoo kutokana na ukosefu wa wataalamu wa kuvitengeneza. Alisema kuwa kutokana na hali hiyo, chuo hicho cha ufundi, kimeanzisha kozi ya vifaa vya maabara na hospitali, lengo likiwa ni kuzalisha wataalamu wengi ili waweze kulitatua tatizo hilo. “Hapa nchini hiki ni chuo cha kwanza kuanzisha kozi hii ya vifaa vya maabara na hospitali, kabla ya kuanzisha kozi hii tulifanya utafiti katika hospitali za rufaa Mount Meru, KCMC, Hydomu, St. Elizabeth na Seliani, zote hizi zina vifaa vya kupimia lakini vimeharibika, hivyo vimewekwa stoo,” alisema ofisa huyo. Alisema kuwa chuo hicho kina wataalamu wa kuvitengeneza vifaa hivyo na kurudisha ubora wake uleule wa awali. Na kwamba kozi hiyo imeanzishwa kutokana na uhitaji wa wataalamu ulioko katika eneo hilo. Tanzania Daima ilitaka kujua hali halisi ilivyo katika Hospitali ya Taifa Muhimbili (MNH), ambapo ofisa habari wake, Aminiel Aligaeshi, alisema kuwa vifaa vingi wanavyovitumia vinatoka nje, hivyo vinapoharibika wanaagiza wataalamu kutoka nje kwa ajili ya kuvitengeneza. “Vifaa vingi ni vya teknolojia ya hali ya juu, vikiharibika tunategemea kuagiza wataalam kutoka nje ya nchi, na wakati mwingine inaweza kuchukua muda kutengenezwa,” alisema. Aligaeshi alikiri kuwa wataalamu wa kuvitengeneza vifaa vya maabara hospitalini ni wachache, hivyo kunahitajika wataalam zaidi ili kupunguza tatizo hilo. “Tunadhani kupitia vyuo vyetu tuongeze wataalam zaidi katika eneo hilo,” alisema na kukipongeza chuo cha ATC kwa hatua kiliyofikia ya kuanzisha kozi hiyo.